Амбасадите на САД во неколку земји од Блискиот Исток упатија предупредување до американските граѓани поради можноста за дополнителна ескалација на регионалниот конфликт, повикувајќи ги да бидат подготвени за евентуално напуштање на регионот.
Во соопштенија објавени на социјалните мрежи од амбасадите во Јордан, Израел и Ирак, се наведува дека американските државјани кои моментално се наоѓаат во регионот треба да размислат за можноста за заминување доколку дојде до влошување на безбедносната состојба.
Граѓаните се повикани редовно да ги следат информациите за летовите, да ги почитуваат безбедносните упатства на локалните власти и да бидат подготвени за можни нарушувања во патувањето, вклучително и откажување летови или привремено затворање на воздушниот простор.
Американската амбасада во Јордан ги советувала своите граѓани да избегнуваат области во близина на американските воени бази, кои неодамна беа цел на ракетни напади. Во Израел, пак, на американските државјани им било препорачано да ги идентификуваат најблиските засолништа за противвоздушна одбрана.
Од Амбасадата на САД во Ерусалим посочиле дека иранските власти се непредвидливи и дека нивните неодамнешни активности покажуваат можност за проширување на нападите и надвор од досегашните подрачја.
Американските дипломатски претставништва продолжуваат да ја следат состојбата во регионот и да ги информираат своите граѓани за новите безбедносни насоки.
