Претседателот на Украина, Володимир Зеленски, денеска изјави дека поддржува одржување на нова средба со европските сојузници, откако украинската делегација имаше конструктивни разговори со американските претставници во Мајами, Флорида.
„Постои општо чувство дека по работата на нашиот дипломатски тим во САД, сега треба да одржиме консултации со европските партнери во поширок формат“, објави Зеленски на платформата Икс по телефонскиот разговор со норвешкиот премиер Јонас Гар Сторе. Зеленски истакна дека во Мајами е забележан брз напредок, но нагласи дека Русија продолжува да не сака да ја заврши војната. Според него, во последната недела руските сили користеле речиси 1.300 борбени дронови, околу 1.200 бомби и девет крстосувачки и други ракети врз Украина.
