Турција побара од Интерпол да издаде црвена потерница за израелскиот премиер Бенјамин Нетанјаху во рамки на судската постапка поврзана со пресретнувањето на хуманитарната флотила „Глобал Сумуд“, која пловела кон Појасот Газа. Информацијата денеска ја потврди турскиот министер за правда Акин Ѓурлек.
Пред 11. Висок кривичен суд во Истанбул се води постапка против вкупно 35 обвинети. Турските власти наведуваат обвиненија за геноцид, злосторства против човештвото, лишување од слобода, тортура, намерно повредување и други кривични дела поврзани со интервенцијата против активистите во меѓународни води.
Налози за апсење на Нетанјаху и уште еден обвинет биле издадени на 14 јули, по што Министерството за правда побарало од турското Министерство за внатрешни работи да ја започне постапката пред Интерпол. Документацијата била доставена и до Министерството за надворешни работи.
Важно е дека барањето на Турција не значи дека Интерпол веќе издал црвена потерница. Интерпол треба да го разгледа барањето, а црвената потерница сама по себе не претставува меѓународен налог за апсење.
Турските власти порачаа дека ќе продолжат со правните постапки во рамки на националното и меѓународното право.
