Најмалку девет лица загинаа, а десетици се повредени во новите руски воздушни напади врз Украина во саботата, при што биле оштетени објекти и критична инфраструктура низ земјата. Нападите се случуваат во период кога Киев се подготвува за, како што предупредува украинското раководство, „многу тешка“ зима поради засилените удари врз енергетскиот систем.
Според „Гардијан“, бројот на цивилни жртви во Украина значително се зголемил во последните два месеца, додека руските сили ги засилуваат нападите врз електроцентралите и другата инфраструктура.
Во меѓувреме, Украина продолжува со напади врз енергетски објекти и магацини во оддалечени делови на Русија, додека двете страни извршуваат напади и врз пловни објекти на противникот.
Украинскиот претседател Володимир Зеленски преку Телеграм соопшти дека Русија од раните утрински часови распоредила речиси 500 дронови против цели во Украина, пренесува „Ројтерс“.
Зеленски оцени дека Москва го проширува конфликтот надвор од бојното поле и се насочува кон украинската економија и инфраструктура.
„Русија сака да ја уништи украинската економија и да го скрши нашиот отпор“, наведе Зеленски, според цитатот пренесен од „Гардијан“.
Особено тешка е ситуацијата во Краматорск, еден од украинските градови на фронтот. Градскиот совет соопшти дека руските сили нападнале цивилни автомобили во три одделни инциденти во период од околу 90 минути.
Во нападите загинале три лица, а уште четири биле повредени.
