Првпат по завршувањето на Втората светска војна, германските вооружени сили трајно стационираат илјадници војници надвор од територијата на својата држава. Овој чекор означува историски пресврт во безбедносната политика на Берлин и јасен сигнал за промена на односот на силите во Европа.
Во рамките на новата стратегија, околу 4.800 војници и приближно 200 цивилни вработени на Бундесверот ќе бидат трајно распоредени во Литванија, а дел од нив ќе живеат таму заедно со семејствата.
Нови воени бази ќе бидат воспоставени во Руднинкај, во близина на границата со Белорусија и недалеку од Вилнус, како и во Рукла, во околината на Каунас, вториот по големина град во балтичката држава.
Според весникот Bild, германската бригада нема да има мировен или стабилизациски мандат. Нејзината исклучива улога ќе биде заштита на источното крило на НАТО и одвраќање на Русија од какво било воено дејствување во регионот. Распоредувањето на германските сили носи јасна порака: секоја агресија врз Литванија автоматски би значела директен судир со германските и сојузничките сили.
Нова формација официјално носи назив Panzerbrigade 45 „Litauen“. Бригадата е воведена во составот на вооружените сили во април 2025 година, а се очекува до крајот на 2027 да достигне целосна оперативна способност и да ја преземе улогата што сега ја имаат ротирачките НАТО сили во Литванија.
НАТО е присутен во Литванија од 2017 година преку мултинационална борбена група, составена од војници од повеќе земји-членки. Во моментов, германските вооружени сили командуваат со единицата, а новата бригада ќе ја обедини постоечката сила во трајна и самостојна структура.
Во составот на бригадата се вклучени: 122. оклопно-механизиран баталјон од Баварија, 203. тенковски баталјон од Северна Рајна-Вестфалија, како и досегашната мултинационална борбена група во Литванија. Бригадата го вклучува и целосното командно, медицинско и логистичко персонално обезбедување, што ѝ овозможува долгогодишно и независно делување.
За разлика од претходните германски мисии во Авганистан или Мали, оваа бригада нема стабилизациски карактер. Нејзината улога е исклучиво колективна одбрана. Опремена со тенкови Leopard 2, борбени возила на пешадија Puma, тешка артилерија и сопствени логистички капацитети, бригадата е подготвена веднаш да одговори на секој напад врз Литванија или другите балтички држави.
Клучниот елемент на нејзиното присуство е одвраќање. Секој вооружен напад врз Литванија автоматски би ја активирал член 5 од Северноатлантскиот договор, со што во конфликтот би бил вклучен целиот НАТО сојуз.
Повеќето од инфраструктурата се финансира од самата Литванија – нови касарни, семејни станови, полигони за обука и логистички центри – со вкупни инвестиции што се проценуваат на приближно милијарда евра. Со тоа, Литванија дополнително ја зацврстува својата улога како клучна точка во новата безбедносна архитектура на Европа.
