„Амазон“ планира големо проширување на својата услуга за достава со дронови во САД, со цел нарачаните производи да стигнуваат до клиентите за само 30 минути.
До крајот на годината компанијата планира да ја прошири мрежата повеќе од шест пати и да ја направи услугата достапна во приградските области на речиси 500 американски градови.
Дроновите ќе можат да пренесуваат пакети со тежина до околу 2,3 килограми, а меѓу областите каде што се планира проширување се Чикаго, Атланта, Кливленд и Бојси.
Летовите главно ќе се изведуваат над приградски населби, каде има помалку високи згради и се подалеку од големите аеродроми.
„Амазон“ веќе испорачал стотици илјади пакети со дронови во текот на оваа година, но компанијата сега сака значително да ја зголеми употребата на оваа технологија.
Со тоа дополнително се засилува и трката со „Волмарт“, бидејќи двете компании инвестираат во технологии со кои сакаат максимално да го скратат времето од нарачување до пристигнување на производот.
Сепак, доставата со дрон има ограничувања. Освен максималната тежина на пакетот, проблем можат да претставуваат дрвјата, објектите и другите пречки околу домовите, бидејќи дронот мора да има безбедно место каде што ќе ја остави пратката.
И покрај брзото ширење, доставата од воздух засега ќе претставува само мал дел од огромниот број пакети што „Амазон“ секоја година ги доставува до своите клиенти.
