Трговскиот спор меѓу Канада и Соединетите Американски Држави дополнително се заострува. Од 8 септември Канада ќе воведе царини од 15 до 50 отсто за повеќе од 700 американски производи, како одговор на американските мерки кон канадскиот извоз.
Една од најзначајните промени се однесува на американскиот челик и алуминиум. Царините за овие производи ќе бидат зголемени од 25 на 50 отсто, со што Отава практично ќе ги изедначи со американските царини за канадскиот челик и алуминиум.
Канадските власти велат дека мерките се насочени кон заштита на домашните компании и работници.
„Канада мора да одговори, а денеска тоа го правиме на пропорционален, насочен и стратешки начин“, изјави канадскиот министер Франсоа-Филип Шампањ.
Повеќе од 700 американски производи на удар
Новите царини ќе опфатат производи од повеќе сектори, меѓу кои челик, алуминиум, хартија, градежни материјали, апарати за домаќинство, земјоделски производи, млечни производи и морска храна.
Канада е вториот најголем извозен пазар за американските производи, па мерките би можеле директно да погодат и компании и работници во САД.
Само американските производители на апарати за домаќинство минатата година продале во Канада производи вредни повеќе од една милијарда долари. Голем дел од нив сега ќе бидат оптоварени со царина од 25 отсто.
Доколку поради повисоките цени падне побарувачката во Канада, дел од американските компании би можеле да се соочат со намалено производство, пократко работно време, па дури и отпуштања.
Канада подготвува и други мерки
Царините можеби нема да бидат последниот чекор на Отава.
Меѓу најсилните инструменти со кои располага Канада е можноста за ограничување на извозот на енергенси, електрична енергија и калиумови ѓубрива кон американскиот пазар.
Премиерот на Онтарио, Даг Форд, порача дека земјата треба да биде подготвена дури и да го прекине извозот на електрична енергија доколку трговскиот конфликт дополнително ескалира.
Онтарио снабдува со струја делови од Њујорк, Мичиген и Минесота, што значи дека евентуалното ограничување би можело директно да се одрази врз американските потрошувачи.
Канада најави и пакет финансиска помош од 7,5 милијарди канадски долари за домашните компании погодени од трговскиот конфликт.
Трамп се заканува со уште повисоки царини
Американскиот претседател Доналд Трамп, пак, сигнализираше дека Вашингтон би можел дополнително да го засили притисокот и се закани со царини од 50 отсто за канадските автомобили и автомобилски делови од 1 јануари.
„Се занимавам со многу земји, а Канада убедливо е најтешката и најнеразумната“, порача Трамп.
Доколку двете страни продолжат со нови контрамерки, последиците од трговската војна би можеле сè повеќе да ги почувствуваат и обичните потрошувачи преку повисоки цени и поскапи енергенси.
