Сè поголем број граѓани во Швајцарија се соочуваат со сериозни финансиски проблеми, иако живеат во една од најбогатите земји во светот. Високите кирии, растечките трошоци за здравствено осигурување и стагнацијата на платите доведуваат до ситуација во која многумина едвај ги покриваат основните животни трошоци.
Според истражување на швајцарскиот весник „Блик“, во кое учествувале над 7.000 испитаници, речиси една третина од граѓаните имаат помалку од 500 франци месечно по плаќањето на сите фиксни трошоци. Дури 13 проценти немаат воопшто преостанати средства, додека нешто повеќе од четвртина успеваат да заштедат над 3.000 франци месечно.
Граѓаните сè почесто јавно зборуваат за своите проблеми. Матјас Рајман вели дека и покрај тоа што работи со полно работно време, а и неговата партнерка дополнително заработува, тешко ги покриваат трошоците за живот со три деца. Енгин Харун, пак, бил принуден да прифати дополнителна работа за да може да ги плати даноците и здравственото осигурување.
Особено погодени се лицата со здравствени проблеми. Миријам Шенк, која прима инвалидска пензија и надоместоци, вели дека по плаќањето на основните трошоци ѝ остануваат многу малку пари и понекогаш не може да си дозволи ни редовни оброци.
Сè повеќе луѓе бараат решение надвор од земјата. Пензионерот Роланд Кауг се преселил во Шпанија бидејќи неговата пензија од 1.900 франци не била доволна за живот во Швајцарија. Слична одлука донела и Марија Баумгартнер, која ја напуштила земјата пред девет години поради високите животни трошоци.
Иако дел од граѓаните сè уште успеваат да заштедат, нивниот број се намалува. Растот на цените на становите и здравственото осигурување најсилно ги погодува домаќинствата со ниски и средни приходи, поради што се зголемуваат повиците за итни мерки за спречување на понатамошно влошување на социјалната состојба.
