Смртоносниот хантавирус, кој го пренесуваат глодари, веќе однесе три животи на крузерот „MV Hondius“ и предизвикува меѓународна тревога. Според аргентинските власти, можно е вирусот да бил донесен на бродот од холандски пар кој претходно посетил депонија во Ушуаја за да фотографира птици, каде можеле да бидат изложени на заразени стаорци.
Драмата се засили кога една патничка се сруши на аеродром и почина, а Светската здравствена организација започна итна потрага по сите лица кои биле во авион со неа. Во меѓувреме, шпанскиот премиер нареди бродот да пристане на Канарските Острови, иако локалните власти се спротивставија од страв дека вирусот може да стигне на нивната територија.
Паниката се прошири и во Швајцарија, каде еден патник што го напуштил крузерот пред избиувањето на епидемијата развил симптоми и сега е во изолација во болница во Цирих. Лекарите предупредуваат дека може да остане во карантин до 45 дена, бидејќи болеста има период на инкубација до осум недели.
Хантавирусот е ретка, но исклучително опасна инфекција со стапка на смртност од околу 40%. Раните симптоми вклучуваат замор, треска, болки во мускулите и главоболка, а во подоцнежна фаза се јавуваат кашлица, отежнато дишење и стегање во градите. Лек за вирусот не постои – може да се применува само терапија за ублажување на симптомите.
Иако епидемијата предизвика глобална загриженост, СЗО нагласува дека ова не е „нов Ковид“, туку сериозна, но ограничена закана. „Ова не е следниот Ковид, но е опасна заразна болест,“ изјави експертот за епидемии Марија ван Керкхове.
