Велика Британија ги повика граѓаните да направат резерви од храна и вода за три дена
Британската влада започна нова национална кампања со која ги повикува граѓаните да обезбедат основни резерви од храна, вода и други неопходни производи, со цел да бидат подготвени за евентуални кризни ситуации.
Кампањата наречена „Be Ready“ предвидува секое домаќинство, доколку е во можност, да располага со резерви доволни за најмалку 72 часа.
Според препораките, граѓаните треба да обезбедат по девет литри вода за секој член на семејството, односно по три литри дневно за пиење. Дополнителни количества се потребни за готвење и хигиена.
Покрај вода и храна со подолг рок на траење, се препорачуваат батериска светилка, резервни батерии, ќебиња, прибор за прва помош, готовина и радио кое може да работи без електрична мрежа.
Британските власти предупредуваат дека силни невремиња, кибернапади и саботажи би можеле да предизвикаат прекини во снабдувањето со електрична енергија, вода, интернет и други основни услуги.
Министерот за безбедност Ден Џарвис порача дека граѓаните треба сериозно да ги сфатат препораките, нагласувајќи дека дури и едноставни подготовки можат да помогнат во итни ситуации.
Во меѓувреме, министерот за одбрана Вес Стритинг предупреди на растечката опасност од непријателски активности насочени кон британската инфраструктура.
Особена загриженост предизвикуваат можните кибернапади врз платните системи, телекомуникациските мрежи и енергетската инфраструктура.
Кампањата започнува непосредно пред зимската сезона, кога силните бури дополнително го зголемуваат ризикот од прекини во снабдувањето.
Слични препораки веќе применуваат Франција, Ирска и Холандија.
Од британската влада нагласуваат дека станува збор за превентивни мерки за подобра подготвеност, а не за најава дека непосредно претстои конкретна опасност.
