Министрите за внатрешни работи на Европската Унија денеска се согласија на построги мерки со кои ќе се забрза депортирањето на лица без право на престој и ќе се овозможи основање центри за баратели на азил надвор од Европа.
Новите правила, иницирани од Данска која претседава со Унијата, вклучуваат проширување на листата на „безбедни“ земји, меѓу кои се и земји-кандидатки за ЕУ, како и Бангладеш, Колумбија, Египет, Индија, Косово, Мароко и Тунис. Целта е да се демотивираат нелегалните мигранти и да се спречи злоупотребата на европското законодавство.
Хрватскиот министер за внатрешни работи истакна дека построгиот пристап ќе ја намали миграцијата кон Европа и дека од јуни следната година голем број нелегални мигранти нема да се обидуваат да пристигнат на континентот.
Новите закони го предвидуваат и „фондот за солидарност“, кој бара од земјите-членки да помогнат на оние под најголем притисок, или со преземање дел од мигрантите, или со финансиска помош. Хрватска, заедно со неколку други држави, беше исклучена од обврската за учество во фондот, додека Унгарија не е ослободена од него.
Министерот за внатрешни работи на Хрватска оцени дека овие решенија ќе ја зајакнат контролата на миграцијата и ги критикуваше шпекулациите во медиумите и на социјалните мрежи, потенцирајќи дека тие нема да влијаат врз новите правила.
