Советот на ЕУ усвои нова регулатива која има за цел да поедностави и забрза процедурите за враќање на лица кои нелегално престојуваат во земјите-членки. Со оваа регулатива се дефинирани обврските на оние кои немаат право на престој и се воспоставуваат инструменти за поголема соработка меѓу државите-членки.
Регулативата им овозможува на земјите-членки да основаат и центри за враќање во трети земји, со што се очекува да се подобри ефикасноста на процесот.
Расмус Стоклунд, министер за имиграција и интеграција на Данска, која претседава со ЕУ, истакна дека новите правила ќе помогнат да се намали бројот на нелегални мигранти кои не се враќаат дома по донесените одлуки. Тој додаде дека граѓаните на трети земји кои нелегално престојуваат ќе имаат нови обврски, а земјите-членки ќе располагаат со повеќе алатки, како подолги притворања и продолжени забрани за влез.
Според Стоклунд, регулативата овозможува и склучување аранжмани со трети земји за воспоставување на центри за враќање, што ќе ја зголеми ефикасноста на процесот на мигрантско враќање во ЕУ.
