Европската Унија постигна договор за воведување трајна максимално дозволена вредност за токсинот цереулид во храната за бебиња, по серијата случаи на контаминирано адаптирано млеко што предизвикаа масовни повлекувања на производи од европскиот пазар.
Според германската новинска агенција ДПА, новите правила имаат цел да ја зајакнат безбедноста на храната наменета за доенчиња и да го намалат ризикот од изложеност на овој токсин.
Од декември 2025 година, во повеќе европски држави беа откриени бебешки формули произведени со контаминирано масло од арахидонска киселина, увезено од Кина.
Откритието предизвика повлекување на поголеми количества производи од продажба и дополнителни проверки на производствените процеси.
Цереулидот е токсин што го произведуваат одредени бактерии и може да предизвика ненадејна мачнина, повраќање и болки во стомакот.
Симптомите можат да се појават од 30 минути до шест часа по консумирањето на контаминираната храна.
Европската комисија посочува дека присуството на овој токсин во прехранбените производи е поврзано со недостатоци во производствениот процес.
Новата безбедносна граница ќе важи за почетните формули за доенчиња, формулите за дополнителна исхрана по почетниот период, како и за храната за посебни медицински намени за бебиња.
Ограничувањето ќе се применува и на производите во прав и на течните формули.
Со оваа мерка, Европската Унија настојува да воспостави постојани стандарди за контрола на цереулидот и да спречи повторување на случаите со контаминирана храна за најмладите.
Новите правила се однесуваат на дозволеното присуство на токсинот и не значат дека сите бебешки формули што моментално се продаваат се небезбедни.
