Украинскиот претседател Володимир Зеленски предложи привремен прекин на огнот со Русија во текот на зимата, со посредство на Соединетите Американски Држави, за да се овозможи заштита на енергетската инфраструктура и организирање претседателски избори во Украина.
Во интервју за германската телевизија ZDF, Зеленски изјави дека побарал од Вашингтон да помогне во постигнувањето договор со Москва.
„Им реков на Американците: можете да постигнете договор со Русите за прекин на огнот во текот на зимата. Тогаш луѓето ќе имаат струја и вода, а во тој период би можеле да одржиме и избори“, изјави Зеленски.
Тој нагласи дека организирањето избори во услови на војна претставува сериозен предизвик, особено поради украинските војници на фронтот, бегалците во странство и граѓаните што живеат на територии под руска контрола.
Според него, околу девет милиони Украинци се наоѓаат надвор од земјата, додека милиони други живеат на окупираните подрачја.
Како една од можностите го спомена електронското гласање, но посочи дека за тоа се неопходни соодветни законски решенија и безбедносни гаранции.
Зеленски истовремено ја отфрли можноста Украина да отстапи дел од својата територија во замена за мировен договор.
Украинскиот претседател повторно побара од Германија испорака на крстосувачки ракети „Таурус“, со кои, според него, украинската армија би можела да уништува руски воени позиции од кои се лансираат ракети.
Тој изрази благодарност за германската воена и хуманитарна помош, како и за американската поддршка.
Зеленски оцени дека засилениот меѓународен притисок би можел да придонесе за започнување мировни преговори.
Засега нема информации дека Русија го прифатила предлогот за зимски прекин на огнот.
