Шпанија, најголемиот светски производител и извозник на маслиново масло, донесе одлука привремено да повлече околу 188.000 тони од производството од пазарот, со цел да спречи дополнителен пад на цените.
Според новата мерка, производителите од ноември 2026 година ќе мора да складираат 12 проценти од произведеното маслиново масло, кое нема да смеат да го продаваат до 30 септември 2027 година.
Одлуката е донесена поради очекувањата за исклучително богата берба на маслинки и големите постојни залихи.
Според официјалните проценки, Шпанија располага со почетни резерви од 357.040 тони, додека годишното производство се очекува да достигне над 1,6 милиони тони.
Големата понуда веќе влијае врз откупните цени. На почетокот на ноември производителите добивале околу три евра за килограм екстра девствено маслиново масло, за разлика од четири евра во истиот период минатата година.
Целта на мерката е да се стабилизира пазарот и да се заштитат производителите од дополнително намалување на приходите.
Шпанија учествува со приближно 45 проценти во светското производство на маслиново масло и со околу 70 проценти во производството на Европската Унија.
Во меѓувреме, во шпанската индустрија се подготвува и големо преземање. Компаниите Dcoop и Acesur постигнале договор за купување на Deoleo Holding, чија вредност, заедно со долговите, се проценува на 520 милиони евра.
Договорот сè уште треба да добие одобрение од надлежните регулаторни институции.
Иако мерката значи привремено ограничување на понудата, таа не претставува повлекување на небезбедно или неисправно масло, туку економска интервенција за регулирање на пазарот.
