Украинскиот претседател Володимир Зеленски изјави дека Украина е подготвена да се откаже од своите амбиции за членство во НАТО алијансата, во обид да покаже сериозна подготвеност за завршување на речиси четиригодишниот конфликт со Русија. Оваа изјава претставува еден од најзначајните дипломатски пресврти од почетокот на војната.
Како противуслуга, Зеленски и неговите европски сојузници инсистираат на цврсти безбедносни гаранции од Европа и Соединетите Американски Држави. Тие се повикуваат на клучниот принцип на НАТО – дека напад врз една држава треба да се смета како напад врз сите – како модел за идната безбедност на Украина, пренесува британскиот весник „Гардијан“.
Сè уште останува неизвесно дали Москва ќе ги прифати овие услови, со оглед на долгогодишните барања и спротивставени позиции на двете страни.
Во меѓувреме, Зеленски утрово пристигна во Соединетите Американски Држави, каде што е предвидена средба со американскиот претседател Доналд Трамп во Палм Бич, Флорида. Се очекува разговорите да се фокусираат на клучните точки кои ја блокираат можноста за мировен договор.
Според најавите, двете најголеми пречки ќе бидат статусот и контролата врз регионот Донбас, кој Москва го смета за своја територија, како и иднината на нуклеарната централа Запорожје, една од најголемите во Европа и објект од стратешко значење.
„Ова се едни од најактивните дипломатски денови во годината. Многу работи можат да се решат пред Нова година. Ние правиме сè што е во наша моќ, но дали ќе има конечна одлука зависи од нашите партнери“, напиша Зеленски на Телеграм.
Тој дополнително нагласи дека меѓународните сојузници на Украина мора да го зголемат притисокот врз Москва, со цел, како што наведе, „Русите да ги почувствуваат последиците од сопствената агресија“.
