Ново истражување откри загрижувачки размери на сексуално вознемирување во германската армија, Бундесверот, покажувајќи дека бројот на вакви случаи е значително поголем од официјално пријавениот.
Резултатите ги претстави германскиот министер за одбрана Борис Писториус, кој призна дека институциите очекувале истражувањето да открие непријатни сознанија.
„Од самиот почеток ни беше јасно дека анализата ќе изнесе на виделина непријатни сознанија“, изјави Писториус.
Истражувањето опфатило повеќе од 8.100 одговорени прашалници, испратени до вкупно 45.000 припадници на германските вооружени сили.
Според резултатите, дури 72 проценти од жените и 31 процент од мажите изјавиле дека барем еднаш во текот на воената служба биле изложени на вербално сексуално вознемирување.
Во последните 12 месеци пред анкетирањето, вакво искуство пријавиле 38 проценти од жените и 16 проценти од мажите.
Дополнително, девет проценти од жените и три проценти од мажите пријавиле физички облици на сексуално недолично однесување, додека по два проценти од двата пола навеле дека доживеале сексуално насилство.
Истражувањето покажало дека особено изложени се помладите жени со пониски воени чинови.
Според министерот, се пријавуваат само меѓу една третина и една шестина од случаите, а многу жртви молчат бидејќи не сакаат да привлекуваат внимание или немаат доверба во механизмите за пријавување.
Писториус најави акциски план со подобра заштита на жртвите, дополнителна обука за претпоставените и советувалиште што треба да биде достапно 24 часа дневно.
Тој порача дека во германската војска мора да важи политика на нулта толеранција кон сексуалното вознемирување и дека раководителите кои не реагираат на вакви случаи нема да можат да останат на своите позиции.
