Добра вест за граѓаните кои редовно ги скенираат фискалните сметки преку апликацијата „МојДДВ“. Исплатата на повратот на ДДВ за третото тримесечје од 2026 година треба да заврши најдоцна до 30 ноември.
Станува збор за повратот на средства за фискалните сметки скенирани во јули, август и септември годинава.
Управата за јавни приходи засега нема објавено точен датум кога ќе започне префрлањето на парите на трансакциските сметки на граѓаните.
Максималниот износ што едно лице може да го добие за едно тримесечје изнесува 2.100 денари.
Тоа значи дека четиричлено семејство, доколку сите членови ја користат апликацијата и го остварат максималниот поврат, може да добие вкупно до 8.400 денари.
Според правилата на мерката, за купените македонски производи и услуги се враќаат 20 проценти од пресметаниот ДДВ, додека за останатите производи и услуги повратот изнесува 10 проценти.
Износот што ќе го добие секој корисник зависи од бројот и вредноста на прифатените фискални сметки.
Пред исплатата, граѓаните треба да проверат дали во апликацијата имаат внесено точни податоци за својата трансакциска сметка.
Ова е особено важно за оние што во меѓувреме смениле банка или ја затвориле претходната сметка, бидејќи неточните податоци можат да предизвикаат одложување на исплатата.
Според претходно објавените информации, во текот на 2025 година преку мерката „МојДДВ“ на граѓаните им биле вратени повеќе од 3,47 милијарди денари, односно приближно 56,4 милиони евра.
