Цената на електричната енергија во Македонија би можела да се зголеми во наредниот период, но Владата најавува мерки со кои евентуалното поскапување би се ограничило на помалку од пет проценти.
Премиерот Христијан Мицкоски на брифинг со новинарите истакна дека Европа се соочува со сериозен енергетски притисок, кој може да се одрази и врз цените на струјата во Македонија.
Според неговите процени, електричната енергија на европските пазари во наредните месеци би можела да достигне цена од 350 до 400 евра за мегават-час.
Истовремено, цената на природниот гас, која претходно изнесувала од 28 до 30 евра за мегават-час, сега се движи околу 86 евра, а во одредени периоди надминува и 100 евра.
„Во овој момент цените на електричната енергија и на гасот во Европа се зголемуваат и до трипати“, посочи Мицкоски.
Како главни причини за енергетската неизвесност ги наведе намалените резерви на гас, послабото производство од хидроелектраните и зголемената побарувачка за струја, вклучително и поради развојот на центрите за податоци и вештачката интелигенција.
За да се намали зависноста од скапата електрична енергија на европските пазари, Владата подготвува план за зголемување на домашното производство.
Меѓу најавените мерки се дополнително обезбедување јаглен за РЕК „Битола“ и РЕК „Осломеј“, како и рестартирање на ТЕЦ „Неготино“.
Според премиерот, целта е граѓаните да бидат заштитени од поголем ценовен удар, а претстојната зима да помине со стабилно снабдување со електрична енергија.
Конечна одлука за поскапување на струјата сè уште не е донесена, а Владата најавува дека ќе настојува цената да остане непроменета или евентуалното зголемување да биде минимално.
