Луксузниот одмор повеќе не е резервиран само за најскапите светски дестинации. Според најновиот Hotel Price Index за 2026 година, патниците можат да најдат хотели со пет ѕвезди во повеќе европски градови за помалку од 200 евра од ноќ.
Најисплатлива дестинација во Европа е Сарагоса во Шпанија, каде просечната цена за хотел со пет ѕвезди изнесува околу 140 евра по ноќевање. Истата цена ја нуди и полскиот град Вроцлав, кој станува сè попопуларен меѓу туристите поради својата архитектура, култура и богат туристички живот.
На Балканот се издвојува Тирана, каде престој во хотел со пет ѕвезди чини околу 150 евра од ноќ. Во оваа група влегуваат и Рига и Загреб, кои нудат висок хотелски стандард по значително пониски цени од најпознатите европски престолнини.
Софија и Ираклион на Крит исто така се меѓу најдостапните луксузни дестинации, со просечни цени од околу 157 евра по ноќевање. Листата ја заокружува Талин во Естонија, каде хотелите со пет ѕвезди чинат во просек околу 163 евра од ноќ.
Извештајот покажува и дека паметниот избор на термин може значително да ги намали трошоците. Резервациите направени во последен момент можат да донесат заштеда до 26 проценти, додека престој што започнува во недела е во просек поевтин за околу 14 проценти во споредба со сабота.
Во време кога патувањата стануваат сè поскапи, сè повеќе туристи ги избираат помалку развиканите европски градови каде можат да уживаат во луксузно сместување без да потрошат богатство.
