Неочекуван инцидент го прекина свечениот пречек пред Елисејската палата во Париз, каде што францускиот претседател Емануел Макрон го пречекуваше својот словачки колега Петер Пелегрини. Еден од членовите на почесната гарда ненадејно се онесвестил и се струполил на скалите пред палатата, додека траела официјалната церемонија.
Снимката од настанот, која првично била емитувана од словачката телевизиска станица ТВ ЈОЈ, а потоа ја објавила и новинската агенција Ројтерс, го прикажува пристигнувањето на автомобилот во кој се наоѓал словачкиот претседател.
Додека возилото се приближувало до влезот на палатата, членовите на почесната гарда стоеле построени на скалите, подготвени за свечениот пречек. Но, само неколку моменти подоцна, еден од гардистите ненадејно изгубил свест и паднал пред присутните.
Останатите членови на персоналот веднаш реагирале и притрчале да му помогнат на колегата. И францускиот претседател Емануел Макрон се приближил до местото каде што паднал гардистот, за да види што се случува.
По укажаната првична помош, припадниците на персоналот го однеле онесвестениот член на гардата од местото на настанот.
По инцидентот, свечената церемонија продолжила. Макрон го поздравил словачкиот претседател Петер Пелегрини, по што двајцата државници заедно влегле во зградата на Елисејската палата.
Засега нема официјални информации за здравствената состојба на гардистот, ниту е позната причината поради која ненадејно се онесвестил. Не е соопштено дали станува збор за здравствен проблем или за друга причина.
Инцидентот бил забележан на телевизиските снимки од официјалниот пречек, а вниманието го привлекла и брзата реакција на присутните, кои веднаш му помогнале на гардистот.
