Американските милијардери вложиле стотици милиони долари во изборните кампањи на републиканските кандидати, но голем дел од нив не успеале да победат на изборите за Конгресот и за гувернерските функции во САД.
Според анализата на француската агенција АФП, пренесена од ХИНА, еден од најголемите финансиски поддржувачи на републиканците бил милијардерот Илон Маск, кој вложил речиси 500 милиони долари во изборниот циклус.
Според податоците на организацијата „OpenSecrets“, Маск бил најголемиот поединечен донатор на федералните избори од 2010 година наваму.
Повеќе од 200 милиони долари за еден кандидат
Особено внимание привлекува изборната трка во Тексас, каде што повеќе од 200 милиони долари од средствата на Маск биле насочени кон поддршка на републиканецот Кен Пакстон.
Сепак, според објавените резултати, победил демократот Џејмс Таларико, со што станал првиот демократ од 1994 година што освоил функција на ниво на целата сојузна држава Тексас.
Големи финансиски вложувања не донеле победа ниту во Охајо и Џорџија. Во Охајо, милијардерот Вивек Рамасвами ја загубил гувернерската трка и покрај вложените приближно 36 милиони долари од сопствените средства.
Во Џорџија, милијардерот Рик Џексон, кој вложил повеќе од 200 милиони долари, исто така бил поразен.
Маск се пошегувал со изборниот резултат
По изборите, Маск на социјалната мрежа X иронично напишал дека неговите „вселенски ласери што влијаат врз изборите“ овојпат не функционирале.
И демократите добиле значителна финансиска поддршка од богати донатори, меѓу кои и поранешниот градоначалник на Њујорк, Мајкл Блумберг, кој издвоил повеќе од 100 милиони долари.
Изборните резултати, според анализата на АФП, покажуваат дека дури и огромната финансиска предност не гарантира победа, особено кога расположението на гласачите е насочено против политиките на актуелната администрација.
