Данска ја обвини Русија дека испукала сигнални ракети на „само неколку метри“ од нејзин воен хеликоптер, додека расте загриженоста од ширење на конфликтот низ Европа. Москва, од друга страна, ги обвини данските воени хеликоптери за „опасни маневри“ во близина на нејзините воени бродови во Балтичкото Море и му врачи официјална нота на Копенхаген, пренесува „Индипендент“.
Руската фрегата испукала две сигнални ракети кон данскиот воен хеликоптер во меѓународни води во близина на брегот на Данска, кои речиси ја погодиле летала, соопшти војската на оваа нордиска земја, членка на НАТО.
Хеликоптерот бил во рутинска мисија за фотографирање на руската фрегата, наведува Данската команда за одбрана, а пренесува Ројтерс. Во соопштението се додава дека сигналните ракети се пиротехнички средства кои на море вообичаено се користат како сигнал за предупредување.
Портпаролот на Кремљ, Дмитриј Песков, според Ројтерс, изјавил дека ги нема сите детали и дека не е во можност да го коментира настанот. Министерот за одбрана Јепе Брус претходно за телевизијата ТВ2 изјави дека Данска ќе го повика рускиот амбасадор во Копенхаген, Владимир Барбин, на состанок во врска со инцидентот.
Рускиот амбасадор: „Опасни маневри од данска страна“
Во меѓувреме се огласи и самиот амбасадор Барбин. — Дански воен хеликоптер изведуваше опасни маневри недалеку од руските воени бродови во Балтичкото Море, а на Копенхаген му е предадена официјална нота за овие инциденти — изјави тој.
Според агенцијата РИА, тој ја префрли вината врз Данска. — Побарав од данската страна да ги преземе сите неопходни мерки за да спречи повторување на вакви инциденти во иднина и во таа прилика им предадов нота со такво барање — изјави тој.
РИА пренесе дека Барбин и минатата година се жалбаше на сличен инцидент. — Во септември 2025 година, за време на состанокот во данското Министерство за надворешни работи, бев принуден да го свртам вниманието на опасните прелети на мала височина кои ги изведе хеликоптер на данското воено воздухопловство над големиот противподморнички брод „Вицеадмирал Кулаков“ — рече Барбин. Тој додаде дека таквите маневри претставувале ризик од судир и можеле да ја попречат опремата на рускиот брод, истакнувајќи дека хеликоптерот тогаш не воспоставил радио-врска ниту реагирал на предупредувањата.
Турција ја обвинува Русија, Полска започна воздушна операција
„Индипендент“ пишува дека набрзо по изјавата на Барбин, Турција (исто така членка на НАТО) ја обвинила Русија за „ширење“ на конфликтот во Црното Море и загрозување на безбедноста на нејзините граѓани.
Во меѓувреме, Полска започна „превентивни“ воени воздушни операции за обезбедување на својот воздушен простор во раните утрински часови, додека Русија ја напаѓаше Украина со дронови. Подоцна беше соопштено дека операцијата е завршена и дека немало повреда на полскиот воздушен простор.
Во исто време, италијански борбен авион на НАТО собори дрон во Литванија, а litванските официјални лица изјавија дека беспилотната летала најверојатно дошла од Белорусија, откако претходно беше прогласена узбуна во главниот град Вилнус и околината.
