Тројца јужнокорејски војници се тешко повредени откако нагазна мина експлодирала во западниот дел од демилитаризираната зона меѓу Јужна и Северна Кореја.
Инцидентот се случил за време на редовни теренски активности на војската, токму на Меѓународниот ден на мирот. За несреќата утрово информираше Здружениот генералштаб на Јужна Кореја, по што веднаш била организирана медицинска евакуација со хеликоптери.
Двајца од повредените војници со хеликоптер биле пренесени директно во воена болница. За третиот војник бил организиран посложен транспорт. Тој најпрво бил префрлен со теренско возило до безбедна локација каде што можел да слета хеликоптер, по што бил пренесен на интензивна нега.
Јужнокорејските воени власти засега не објавија официјални информации за точниот степен на повредите. Сепак, според извори од јужнокорејските медицински служби, војниците претрпеле тешки повреди на екстремитетите како последица на силната експлозија.
Експлозијата се случила јужно од воената демаркациона линија, во рамки на демилитаризираната зона која се протега во ширина од околу четири километри и го раздвојува Корејскиот Полуостров.
Демилитаризираната зона е воспоставена по завршувањето на борбите во Корејската војна во 1953 година. Бидејќи конфликтот бил прекинат со примирје, а не со официјален мировен договор, Јужна и Северна Кореја формално и понатаму се сметаат за во состојба на војна.
Подрачјето долж демаркационата линија со децении е познато како едно од најминираните места во светот. Старите нагазни мини претставуваат постојана опасност, а дополнителен проблем создаваат дождовите и ерозијата, поради кои експлозивните направи можат да бидат поместени од нивните првични позиции.
Безбедносната состојба на границата дополнително се влошила во изминатиот период. Севернокорејските сили, според воените извештаи, интензивно работат на зајакнување на граничниот појас, при што поставуваат нови мински полиња, градат противтенковски пречки и поставуваат високи огради.
Дополнителен ризик претставуваат и сезонските поплави. Надојдените води можат да откопаат и да поместат стари нагазни мини, кои потоа можат да бидат однесени преку граничните водотеци и да завршат во близина на патеките по кои се движат јужнокорејските војници.
