По победата во Џорџија, 39-годишниот сенатор Џон Ософ станува фаворит на миленијалците и тема на сериозни калкулации за претседателските избори во САД во 2028 година.
Додека американската политичка сцена сè уште се занимава со последиците од изборите за Конгрес, меѓу демократите сè погласно се споменува името на човек кој дел од партијата веќе го гледа како можен претседателски кандидат за 2028 година. Станува збор за Џон Ософ, 39-годишен сенатор од Џорџија, чија убедлива изборна победа дополнително ги поттикна шпекулациите за неговите претседателски амбиции.
Ософ на изборите на 3 ноември го победи републиканецот Мајк Колинс, поддржан од американскиот претседател Доналд Трамп, и го задржа сенаторското место во Џорџија, сојузна држава во која победи и на претседателските избори во 2024 година.
Британски „Дејли мејл“ се прашува дали веќе го гледаме идниот претседател на Соединетите Држави, укажувајќи на неговата необична комбинација од политичка харизма, популарност на социјалните мрежи и сè поотворена поддршка од некои од највлијателните демократи, пренесува „Јутарњи лист“.
Обама изговори зборови што предизвикаа одушевување
Посебно внимание предизвика предизборниот собир одржан на 28 октомври, на кој Ософ беше поддржан од поранешниот американски претседател Барак Обама. Зборувајќи за младиот сенатор, Обама се шегуваше на сметка на неговиот изглед:
„И не е тоа само затоа што е толку уреден. Не е ни затоа што на снимките изгледа како Кенеди, толку згоден“, рече Обама, предизвикувајќи одушевување кај присутните.
Потоа истакна дека Џон Ософ учел од легендарниот борец за граѓански права Џон Луис, кого и самиот Обама го сметал за свој политички идол.
Споредбите со семејството Кенеди не се случајни. Изгледот на Ософ, одмерениот јавен настап и способноста за привликување помлади гласачи веќе го направија своевремена интернет-ѕвезда. На социјалните мрежи се појавија профили посветени на неговиот изглед, а коментаторите почнаа да дискутираат дури и за неговата сè поизразена мускулеста градба.
„Гардијан“ уште во септември ја анализираше неговата способност за користење на социјалните мрежи, вклучувајќи го карактеристичниот начин на снимање од долен агол, кој го доби називот „аголот на Ософ“.
Нејт Силвер веќе го издвои
Зад сè поголемата популарност стои и политички профил што ги надминува снимките на интернет. Ософ е поранешен продуцент на истражувачки документарци, а во Сенатот се истакна со остри испитувања на функционерите од администрацијата на Трамп, особено за прашањата поврзани со корупцијата, злоупотребата на државната власт и функционирањето на сојузните институции.
Истовремено, се труди да се претстави како прагматичен политичар кој се занимава со секојдневните проблеми на гласачите, вклучувајќи ги трошоците за здравствена нега, цените на лековите и работата на јавните служби.
Неговиот политички подем ја привлече и пажњата на познатиот американски аналитичар Нејт Силвер, кој во разговор за подкастот „The Powers That Be“ го издвои како свој прв избор во хипотетичкото разгледување на демократските претседателски кандидати за 2028 година.
Постои само еден проблем: Ософ тврди дека не сака да биде претседател
Самиот сенатор упорно ги отфрла шпекулациите за претседателска кандидатура:
„Немам никаков интерес да се кандидирам за претседател. Не се кандидирам за претседател, се кандидирам за нов мандат во Сенатот“, изјави тој за време на дебатата во октомври, ветувајќи дека ќе го одработи целиот шестгодишен сенаторски мандат.
Сепак, американските медиуми потсетуваат на интересна историска паралела. Обама во 2006 година исто така тврдеше дека нема да се кандидира на претседателските избори во 2008 година, за само неколку месеци подоцна да ја најави својата кандидатура, а две години подоцна да стане претседател на САД.
Победата на Ософ во Џорџија дополнително го засили интересот за неговата политичка иднина. До претседателските избори остануваат две години, а Демократската партија сè уште треба да одлучи кој ќе ја претставува во борбата за Белата куќа. Ософ засега инсистира дека претседателската трка не го интересира, но неговите сè побројни поддржувачи очигледно немаат намера да се откажат од таа идеја.
