Москва и Московската област во текот на ноќта биле цел на масовен напад со беспилотни летала, при што, според руските власти, кон руската престолнина биле насочени повеќе од 600 дронови.
Градоначалникот на Москва, Сергеј Собјанин, преку „Телеграм“ соопштил дека руската противвоздушна одбрана уништила 201 украински дрон во Московската област, додека останатиот дел од леталата, според неговите тврдења, бил пресретнат пред да стигне до регионот.
Според Собјанин, во нападите биле повредени три лица, но засега не се објавени дополнителни детали за нивната состојба.
Пријавени напади врз индустриски објекти
Украинскиот весник на англиски јазик „Kyiv Independent“ објави дека украинските сили извршиле напади врз магацин во сопственост на рускиот онлајн трговски гигант „Wildberries“, како и врз индустриски објекти во повеќе руски градови во поширокиот регион.
Руските власти засега не соопштуваат детали за евентуалниот обем на материјалната штета предизвикана од нападите.
Инцидентот е уште еден во низата масовни воздушни напади во рамките на војната меѓу Русија и Украина, при што последните месеци сè почесто се пријавуваат напади со беспилотни летала на подрачја длабоко во руската територија.
