Францускиот претседател Емануел Макрон истакна дека иднината на Украина не може да се решава без учество на самите Украинци, кои повеќе од три години се борат за својата слобода и безбедност. Неговата изјава следува неколку дена пред закажаната средба меѓу рускиот претседател Владимир Путин и американскиот претседател Доналд Трамп.
Макрон преку социјалната мрежа X нагласи дека „иднината на Украина не може да се одлучи без Украинците. Тие се во првите редови на борбата за слобода и безбедност“. Тој додаде дека и Европејците мора да учествуваат во решавањето на конфликтот, поради значењето на безбедноста во регионот.
Претходно, Макрон имал телефонски разговори со украинскиот претседател Володимир Зеленски, германскиот канцелар Фридрих Мерц и британскиот премиер Кир Стармер, со цел ускладување на позициите пред дипломатските преговори.
По овие разговори, Зеленски нагласи дека Украина, Франција и другите партнери се посветени на постигнување вистински мир.
Средбата меѓу Путин и Трамп е закажана за петок во Алјаска, при што Путин инсистира на целосна руска контрола над источните региони Донецк и Луганск, што украинскиот претседател категорично го одбива.
