Саудиска Арабија привремено го затвори клучниот нафтовод Исток-Запад по напад со беспилотни летала лансирани од територијата на Ирак, додека ескалацијата на Блискиот Исток ја турна цената на нафтата над 100 долари за барел.
Властите во Ријад соопштија дека нафтоводот е затворен како мерка на претпазливост. Сателитските снимки покажале изгорена земја и чад во близина на погодената локација, а според саудиското Министерство за надворешни работи, во нападот биле повредени неколку лица и била предизвикана материјална штета чиј обем сè уште се проценува.
Нафтоводот Исток-Запад е долг околу 1.200 километри и има огромно стратешко значење за Саудиска Арабија, бидејќи овозможува транспорт на нафта со заобиколување на Ормускиот Теснец. Преку системот се транспортира количина што одговара на околу четири до пет проценти од светската понуда на нафта.
Ирачките власти потврдиле дека дроновите биле лансирани од провинцијата Мајсан, која се граничи со Иран. Командантот за операции во провинцијата бил разрешен, а започната е истрага за утврдување кој стои зад нападот.
По телефонски разговор меѓу саудискиот и ирачкиот премиер, Ријад одлучил во оваа фаза да не презема воен одговор. Саудиска Арабија, сепак, порача дека го задржува правото да ги преземе сите неопходни мерки за заштита на својот суверенитет, инфраструктура и население.
Нападот доаѓа во период на дополнително влошување на безбедносната состојба во регионот. Напредувањето на јеменските Хути создава дополнителен притисок врз поморските патишта за транспорт на енергенси, особено во близина на Баб ал-Мандеб и Црвеното Море.
Неизвесноста околу снабдувањето веднаш се одрази и на светските пазари, каде цената на суровата нафта се искачи над 100 долари за барел, првпат од јули.
