Во Европската Унија се отвора сериозна дебата за иднината на европската дипломатија, а според информации на „Еуроњуз“, зад можните промени би можела да стои претседателката на Европската комисија, Урсула фон дер Лајен
Според дипломатски извори, во Брисел се разгледува длабока реформа на европската дипломатска служба, која би можела значително да ја намали моќта на актуелната шефица на дипломатијата на ЕУ, Каја Калас.
Наводно, дел од земјите-членки не се задоволни од сегашниот начин на функционирање на дипломатскиот апарат и бараат поголем дел од надлежностите повторно да се вратат во рацете на националните влади. Доколку таквото сценарио се реализира, улогата на европската дипломатска служба би била значително ограничена.
Во дипломатските кругови кружат и сомнежи дека целата полемика не е само прашање на ефикасност, туку и резултат на внатрешни борби за влијание меѓу најмоќните институции во Унијата. Токму затоа многумина ја гледаат реформата како потенцијална пресметка за контрола врз европската надворешна политика.
Европската дипломатска служба располага со буџет од околу една милијарда евра и има клучна улога во обликувањето на ставовите на Брисел кон глобалните прашања. Затоа евентуалните промени би можеле да предизвикаат значајно прераспределување на моќта во рамките на Унијата.
Особено внимание привлекува фактот што Калас во изминатиот период водеше остар курс кон Русија, што наиде на поддршка кај дел од членките, но и на критики од држави кои сметаат дека националните влади треба да имаат поголем збор во креирањето на надворешната политика.
