Украинскиот претседател Володимир Зеленски најави продолжување на нападите врз руската нафтена индустрија, нагласувајќи дека украинските сили веќе ги одредиле следните цели за удари со долг дострел.
Според Зеленски, ваквите операции претставуваат одговор на континуираните руски напади врз украинската енергетска инфраструктура.
„Операцијата против руската индустрија за преработка на нафта продолжува како одговор на руските напади врз украинските енергетски објекти“, изјави Зеленски во објава на Телеграм.
Тој им се заблагодари на украинските одбранбени и безбедносни сили за прецизноста и континуитетот на операциите со долг дострел.
Украинскиот претседател посочи дека електраните, енергетските мрежи, системите за греење, водоснабдувањето и цивилната инфраструктура и понатаму се изложени на напади со руски беспилотни летала и ракети.
Според неговите тврдења, Москва не покажува подготвеност за деескалација и продолжува да планира нови напади.
Зеленски нагласи дека Украина сака што поскоро да се постигне мир, но смета дека одлуката за прекин на војната зависи од Русија.
Како пример ја наведе неодамнешната хуманитарна операција во градот Олешки, каде што кон крајот на октомври било воспоставено привремено локално примирје за спроведување хуманитарни активности.
Според него, овој случај покажува дека намалувањето на воените дејства е можно доколку постои политичка одлука.
„Украина не треба да се убедува дека мирот е потребен што поскоро. Ние го сакаме. Русија треба да одлучи дека времето за војна поминало“, порача Зеленски.
Тој оцени дека украинските удари со долг и среден дострел, заедно со меѓународниот притисок врз Москва, можат да создадат услови за вистински мировни преговори.
