Археолозите во холандскиот град Нијмеген открија најголем комплекс од римски јавни бањи досега пронајден во Холандија, стар речиси 2.000 години. Откритието фрла ново светло врз богатството и значењето на античкиот град Улпиа Новиомагус, кој во римско време бил еден од најважните урбани центри во регионот.
Ископувањата започнале во рамки на подготовките за изградба на нов станбен комплекс, но наместо современа инфраструктура, археолозите наишле на извонредно сочувани остатоци од антички град. Покрај монументалната бања, биле откриени улици, станбени блокови, големи куќи и кула, што овозможило реконструкција на дел од римската населба од вториот и третиот век.
Бањата се простирала на најмалку 4.900 квадратни метри, што ја прави најголема од ваков вид откриена во Холандија. Во комплексот биле пронајдени простории за топли, млаки и ладни бањи, како и добро зачуван систем за подно греење – познат како хипокауст – кој овозможувал циркулација на топол воздух под подовите.
Археолозите откриле и бројни докази за раскошниот изглед на објектот. Ѕидовите биле украсени со мермер, подовите со декоративни плочки, а делови од фасадата биле изработени од варовник и песочник.
За време на ископувањата биле пронајдени десетици илјади артефакти, меѓу кои монети, накит, бронзени статуи, прстени, украсни шноли и бронзена биста на римскиот бог Дионис. Според археолозите, дел од најдобро сочуваните остатоци ќе останат видливи и ќе бидат интегрирани во идниот станбен комплекс, со цел посетителите да можат да ја запознаат богатата римска историја на овој град.
