Турската влада донесе итна одлука за изградба на модерни нуклеарни засолништа во сите 81 провинции, со цел заштита на населението во случај на војна, катастрофа или нуклеарна закана. Првите градежни активности веќе започнаа во Анкара, јави НТВ.
Проектот го спроведува Турската администрација за домување во масовни објекти (ТОКИ), а се темели на сеопфатна студија на Министерството за животна средина, урбанизација и климатски промени. Анализата, разгледана на состаноци на кабинетот со претседателот Реџеп Таип Ердоган, укажала на сериозен недостаток од функционални засолништа, при тоа што постојните објекти не ги исполнуваат безбедносните стандарди.
Новите засолништа ќе бидат дизајнирани како издржливи и лесно достапни структури за итни случаи, со цел да се зголеми безбедноста на граѓаните низ целата земја. При изработката на планот биле земени предвид искуствата на земји како Израел, Јапонија и Швајцарија, каде ваквите засолништа се составен дел од цивилната заштита.
Иако уште од 1987 година постои регулатива која предвидува изградба на засолништа во згради со одредена големина, таа често се игнорирала, а просториите наместо заштита биле користени како паркинзи или складишта. Новата иницијатива има за цел да го надмине овој проблем и да воспостави национална мрежа на безбедносни објекти, обезбедувајќи сигурност за граѓаните во потенцијални кризни ситуации.
