Едвај чуен глас од под урнатините им помогнал на спасувачите во Кали, Колумбија, да пронајдат живи тримесечно бебе и неговиот татко по силниот земјотрес што го погодил подрачјето.
Брајан Осорио Зулуага се враќал од работа кога забележал дека петкатниот станбен комплекс „Ла Торе дел Лимонар“ се урнал. Откако се приближил, ги замолил присутните да замолчат и почнал да довикува кон урнатините.
Од под бетонските плочи слушнал машки глас кој му одговорил дека е таму со бебе.
Осорио веднаш почнал да расчистува, а во спасувањето му се приклучиле уште седум лица. По напорна акција биле пронајдени тримесечниот Саломон и неговиот татко Хуан Давид Гомез.
Бебето немало скршеници, туку неколку гребнатини и полесна повреда на главата. Таткото бил повреден и по извлекувањето бил опериран.
Сепак, потрагата по семејството продолжува. Под урнатините сè уште се бараат 29-годишната Валентина Ванегас Галиано, мајката на бебето, и нејзиниот помлад брат Хуан Естебан.
Според информациите што ги дал спасениот татко, Валентина би можела да се наоѓа неколку метри подалеку, поблиску до влезот на комплексот.
Во првите 12 часа од урнатата зграда биле извлечени повеќе од 20 преживеани, а спасувачките екипи продолжуваат внимателно да пребаруваат меѓу бетонските плочи и металот.
