Вкупно 149 лица останале заробени во областа на вулканот Толбачик на рускиот полуостров Камчатка, откако силното невреме го оштетило и уништило патот кој води до туристичката маршрута. Меѓу заглавените се наоѓаат 117 туристи, кои според најавите ќе бидат евакуирани со хеликоптери.
Преостанатите 32 лица се возачи и засега ќе останат на локацијата. Поради уништениот пат, туристите и нивните водичи не можат да го напуштат подрачјето по копнен пат, па надлежните организираат воздушна евакуација.
Планирано е туристите со хеликоптери да бидат пренесени до селото Есо. Оттаму, со автобуси ќе продолжат кон Петропавловск-Камчатски, со што ќе биде овозможено нивно безбедно враќање откако невремето го прекина копнениот пристап до вулканската туристичка зона.
