Властите во Белорусија денеска ослободија вкупно 123 затвореници, меѓу кои и добитникот на Нобеловата награда за мир Алес Бељацки, како и истакнатите опозиционери Марија Колесникова и Виктор Бабарико. Информацијата ја потврдија државната новинска агенција БелТА и правобранителите.
Овој потег доаѓа во чувствителен политички момент, кога белорускиот претседател Александар Лукашенко настојува да ги подобри односите со САД и да издејствува олеснување на долгогодишните западни санкции наметнати поради кршење на човековите права.
Како директен резултат на преговорите, Соединетите Американски Држави претходно денеска соопштија дека ги укинуваат санкциите за белорускиот калиум карбонат. Одлуката ја објави Џон Коул, специјалниот пратеник на американскиот претседател Доналд Трамп за Белорусија, по дводневните средби со Лукашенко во Минск.
Во изјава за новинарите, Коул ги оцени разговорите како „многу продуктивни“ и истакна дека нормализацијата на односите меѓу Вашингтон и Минск е стратешка цел на САД.
– Ги отстрануваме санкциите, ослободуваме затвореници. Постојано комуницираме меѓу себе – изјави Коул, додавајќи дека односите меѓу двете земји се движат од „мали чекори кон посигурни чекори“.
Иако 123 лица беа помилувани, нивната понатамошна судбина не беше иста. Според украинскиот Координативен центар за воени заробеници, повеќе од 110 од ослободените биле префрлени во Украина.
„Белорусија префрли 114 цивили во Украина, меѓу кои и украински државјани“, објави Центарот на „Телеграм“, наведувајќи дека на дел од ослободените им е овозможено, доколку сакаат, да заминат и во Полска или Литванија.
Советникот на опозициската лидерка во егзил Светлана Тихановска, Франак Вјачорка, изјави дека првичниот план бил сите ослободени да бидат испратени во Литванија, но дека Лукашенко „ненадејно ја сменил одлуката“ и дел од нив ги упатил кон Украина.
Сепак, Нобеловецот Алес Бељацки и уште осуммина ослободени, меѓу кои и најпознатите опозициски фигури, веќе се наоѓаат во Литванија, што го потврди и американската амбасада во Вилнус. Меѓу другите познати имиња на ослободени затвореници се Максим Знак, Марина Золотова, Владимир Лабкович и Валентин Степанович.
Белорусија, како близок сојузник на Русија, со години е под силен притисок од Западот поради репресијата врз опозицијата и човековите права, како и поради тоа што ѝ дозволи на Москва да ја користи нејзината територија за инвазијата врз Украина во 2022 година.
