Невообичаено силни дождови предизвикаа катастрофални поплави во делови од американската држава Вашингтон, што доведе до евакуација на цели села и мали градови. Претседателот Доналд Трамп потпиша прогласување вонредна состојба за погодените области.
Обилните врнежи, веќе наречени „најсилни досега“, донесоа повеќе од 300 литри дожд на квадратен метар за само неколку дена во западниот и централниот дел на државата. Реките излегоа од коритата, поплавувајќи домови, улици и инфраструктура, што предизвика драматични спасувања од покриви и возила. Како резултат, беше затворен и еден граничен премин кон Канада.
Поплавите особено ги погодија канадските погранични градови Сумас, Нууксак и Еверсон. Локалните и федералните спасувачки служби вршеа десетици операции, спасувајќи луѓе од покриви и автомобили. Водата на повеќето места достигнува длабочина од 60 до 90 сантиметри, а во малото гратче Дувал, североисточно од Сиетл, нивото на водата за само четири часа стигна до 1,2 метри, а единствениот начин за спас беше со противпожарни чамци.
Припадниците на Националната гарда апелираа до илјадници жители да ги напуштат домовите и да се упатат кон засолништа. Нивото на реката Скигит достигна рекордни 11,2 метри, највисоко во историјата, што доведе до итна евакуација на десетици илјади жители.
Се очекува рекордната вода постепено да се повлекува, но властите предупредуваат дека нивото останува високо и дека постои ризик од пробиви на насипи и лизгање на земјиштето. Исто така, постои опасност од нови обилни дождови за претстојната недела.
Досега нема пријавени смртни случаи, но штетата се проценува како значителна. Според експертите, интензивните врнежи се делумно предизвикани од климатските промени, кои ја зголемуваат веројатноста за вакви екстремни временски појави.
