Реал Мадрид објави дека ќе бара значајна отштета од УЕФА, откако Окружниот суд во Мадрид ја потврди пресудата од мај 2024 година дека УЕФА, Шпанската фудбалска федерација (РФЕФ) и Ла Лига применувале антиконкурентски практики и го злоупотребиле својот доминантен пазарен статус со забрана на клубовите да учествуваат во Европската суперлига.
УЕФА соопшти дека пресудата „не го потврдува проектот за Суперлигата“ и дека „ниту ги поткопува постојните правила на УЕФА“.
Реал Мадрид беше еден од 12-те клубови што ја поддржаа Суперлигата во 2021 година, проект кој пропадна поради притисок од владите и навивачите. Европскиот суд на правдата веќе пресуди во декември 2023 дека забраната за учество на клубовите во Суперлигата е нелегална, што ја натера УЕФА да ги измени своите правила.
Во соопштението на Реал Мадрид се истакнува дека пресудата „отворува пат за барање значителна отштета од УЕФА“, додека УЕФА нагласува дека ќе ја разгледа одлуката пред да одлучи за понатамошни чекори и дека останува посветена на европскиот спортски модел, базиран на спортски заслуги, отворен пристап и солидарност.
Ла Лига, пак, ја почитува одлуката, но ја повторува својата „цврста посветеност на интегритетот и стабилноста на националните натпреварувања“. Претседателот Хавиер Тебас нагласува дека пресудата не претставува поддршка за Суперлигата, туку потврдува дека правилата мора да се применуваат транспарентно и објективно.
Сагата околу Европската суперлига започна во април 2021 година, кога 12 клуба објавија учество, но проектот пропадна за само 72 часа поради критики од навивачи, лиги и влади.
