Најновиот Аналитички извештај за јавна перцепција за 2025 година покажува значаен пресврт во односот меѓу јавноста и македонскиот фудбал. Истражувањето, спроведено според европските стандарди и принципите на „UEFA Good Governance“, открива дека Фудбалска федерација на Македонија бележи високо ниво на доверба и стабилност по години на турбуленции.
На репрезентативен примерок од 1.563 испитаници, федерацијата добила позитивни оценки во клучните сегменти – транспарентност, одговорност и фер-плеј. Дури 78% од граѓаните изразиле доверба во ФФМ како институција, додека само 10% имаат негативна перцепција. Особено се истакнува податокот дека 86% од испитаниците веруваат оти принципите на фер-игра се почитуваат, а 76% сметаат дека натпреварите во домашното првенство се регуларни – резултат над регионалниот просек.
Силна поддршка добива и актуелното раководство. Претседателот на ФФМ, Масар Омерагиќ, е оценет како добар или многу добар од 89% од анкетираните. Повеќе од половина од јавноста ја истакнува неговата лидерска способност и улогата во обезбедувањето институционална стабилност, додека негативните оценки се речиси занемарливи.
Истражувањето укажува и на препознавање на вложувањата во иднината. 76% од граѓаните сметаат дека ФФМ активно инвестира во младинскиот фудбал, а секој втор испитаник е задоволен од напредокот на младите категории. Ставовите околу А-репрезентацијата остануваат поделени, што ја одразува високата амбиција на навивачите.
Гледајќи напред, оптимизмот доминира. 71% веруваат дека сегашниот правец носи напредок, а дури 87% би ја поддржале работата на ФФМ и во наредната година – силен сигнал дека довербата во македонскиот фудбал повторно се гради.
