Фудбалскиот клуб Ливерпул презеде една од најголемите акции против нелегалната препродажба на билети, изрекувајќи 432 доживотни забрани за влез на стадионот на лица поврзани со вакви активности.
Акцијата беше спроведена во соработка со полицијата од Мерсисајд, која во рамки на истрагата заплени имот вреден повеќе од 1,2 милиони фунти, за кој се сомнева дека потекнува од нелегална продажба на билети и перење пари.
Покрај доживотните забрани, клубот изрече и 115 суспензии на неопределено време, додека истрагите за други случаи продолжуваат.
Главниот инспектор Ник Сафилд ја оцени операцијата како успешен пример за соработка меѓу полицијата и клубот, нагласувајќи дека целта е да се заштитат вистинските навивачи од нелегалните препродавачи.
Ливерпул веќе подолго време води интензивна борба против злоупотребите со билетите. Според податоците објавени минатата година, клубот откажал 145.000 нарачки за билети во период од две години. Само во минатата сезона биле анализирани речиси 700.000 регистрации, при што биле блокирани или укинати 67.663 сомнителни сметки, а уште 121.379 профили се предмет на истрага.
Дополнително, 3.847 сезонски билети за сезоната 2025/26 биле поништени поради сомнеж за злоупотреба и повторно пуштени во продажба, со цел да бидат достапни за вистинските навивачи.
