Појавата на змии на неколку различни локации низ Скопје во изминативе денови предизвика сериозна вознемиреност кај граѓаните, особено затоа што дел од случаите се регистрирани во густо населени и фреквентни делови од градот.
Според информациите што се споделуваат на социјалните мрежи, змии биле забележани на патот меѓу Горно и Долно Лисиче уште на 29 април, потоа во близина на Кванташкиот пазар на 11 мај, како и во населбата Аеродром, на улицата „Владимир Комаров“ број 27, ден претходно.
Фотографии и видеа од змиите брзо се проширија на интернет, а граѓаните јавно прашуваат кој треба да реагира и дали институциите навремено ги одржуваат јавните површини.
Иако појавата на змии во пролетниот и летниот период не е реткост, особено кога температурите растат, а тревните и запуштените површини не се одржуваат редовно, овие случаи повторно ја отворија дилемата околу тоа кој е одговорен за превенција и интервенција во вакви ситуации.
Според претходни информации од Град Скопје, градските власти не се директно надлежни за дератизација и постапување при појава на змии, влекачи или глодари. Согласно Законот за Град Скопје, оваа обврска припаѓа на десетте скопски општини, кои се задолжени за дезинфекција, дезинсекција и дератизација на населените места.
Тоа значи дека општините имаат обврска да се грижат за редовно косење на тревата, расчистување на диви депонии и запуштени парцели, како и за одржување на јавните површини на својата територија. Воедно, тие треба да координираат и со стручни служби кога граѓаните ќе пријават појава на змии во урбана средина.
Сепак, и покрај тоа што директната надлежност е кај општините, Град Скопје има важна улога во превенцијата преку јавните претпријатија и службите задолжени за одржување на зеленилото и јавната чистота. ЈП „Паркови и зеленило“ е одговорно за значителен дел од зелените површини низ градот, а токму редовното косење, расчистувањето на високата трева и отстранувањето на отпадот се сметаат за клучни мерки за намалување на ризикот од појава на змии.
Граѓаните сега очекуваат побрза координација меѓу институциите, но и јасни информации каде треба да пријавуваат вакви случаи, особено кога змиите се појавуваат во близина на домови, улици и пазари со голема фреквенција на луѓе.
