Инспекциските служби на Општина Центар извршија вонредни контроли на плоштадот „Филип Втори“ и влезот на Старата скопска чаршија, при што било откриено дека неколку објекти се диво поставени и незаконски заградени.
„При контролата беше утврдено постоење на повеќе диво поставени и заградени објекти. За истите се донесени решенија за нивно отстранување, во рок од пет дена,“ соопштија од општината.
Доколку сопствениците не ги отстранат самите, Општина Центар ќе пристапи кон нивно присилно отстранување, потврдија надлежните.
Градоначалникот Горан Герасимовски порача дека општината ќе продолжи со силен надзор и редовни контроли, со цел да се спречи секое узурпирање на јавен простор и да се зачува достоинствениот изглед на центарот на градот.
„Општина Центар нема да дозволи јавниот простор да се претвори во приватен имот. Ќе продолжиме со континуирани контроли за да го зачуваме редот, безбедноста и автентичниот изглед на просторот,“ истакна Герасимовски.
