Вчера во Градскиот парк во Скопје се одржа шестото издание на фестивалот „Ден на граѓанските организации“, во организација на Civica Mobilitas и МЦМС.
На настанот учествуваа повеќе од 80 граѓански организации од целата земја, кои пред граѓаните ги претставија својата работа, проекти и иницијативи преку штандови, работилници, презентации и дебати.
🌱 Граѓанското општество е еден од темелите на секое демократско општество. Тоа е важен глас на граѓаните, мост меѓу луѓето и институциите и значаен коректив на општествените процеси. Силното граѓанско општество придонесува за поголема отчетност на институциите, заштита на човековите права и создавање политики што одговараат на реалните потреби на граѓаните.
Со повеќе од две децении искуство во граѓанскиот сектор, за мене овој настан има посебно значење. Затоа со задоволство ги посетив организациите кои работат во областа на здравството, особено здруженијата на пациенти.
🩺 Посебно внимание посветив на Палиум – Здружението за поддршка на палијативните пациенти, Нефрон – Здружението на бубрежно болни, „До бебе по патот на ИВФ“ и ХЕРА.
Нивното искуство, знаење и секојдневната работа со граѓаните се исклучително значајни за креирање поквалитетни и поефикасни здравствени политики. Како Министерство за здравство, остануваме отворени за соработка и заедничко наоѓање решенија што ќе бидат во интерес на пациентите и граѓаните.
🏥 Истовремено, со особено задоволство ги посетив и моите поранешни организации – Македонскиот центар за меѓународна соработка (МЦМС) и Македонската развојна фондација за претпријатија.
Тоа се места каде што поминав значаен дел од мојот професионален пат и години кои оставија силен белег врз мојот личен и професионален развој.
🤝 Ваквите настани се потсетник дека најдобрите решенија се создаваат преку дијалог, соработка и активно учество на граѓаните.
Силни институции и силно граѓанско општество не се спротивставени – тие се партнери во градењето подобро општество.
