Холивудската ѕвезда Џони Деп приреди вистинско изненадување за посетителите на Comic-Con во Сан Диего, појавувајќи се целосно маскиран како Ебенезер Скруџ – ликот што ќе го игра во неговиот нов филм.
Актерот ќе ја толкува улогата на легендарниот намќор во претстојниот филм „Ебенезер“, продукција на студиото Paramount, во режија на Тај Вест. Премиерата на филмот е закажана за ноември годинава.
Деп се појавил пред тематската продавница „Скруџ и Марли“ во квартот Гасламп во Сан Диего, каде што уште од пладне се собирале бројни обожаватели, очекувајќи специјално изненадување како дел од промотивната кампања за филмот.
Настанот започнал со настап на изведувачи кои пееле божиќни песни, создавајќи празнична атмосфера и покрај летните температури од околу 27 степени. Само неколку моменти подоцна, пред публиката се појавил Џони Деп, облечен во препознатливиот црн капут на Скруџ и целосно внесен во ликот.
„Немате ли работа?“, им се обратил на присутните со препознатлив рапав глас. „Изгледа имате премногу слободно време. Јас, за разлика од вас, работам“, рекол актерот, останувајќи верен на карактерот што го игра.
Кога фановите го поздравиле со зборовите „Добар ден, господине Скруџ“, Деп во духот на ликот возвратил со краток одговор: „Што е доброто?“.
Иако неговото доаѓање било строго чувано во тајност, дел од најверните обожаватели успеале навреме да сфатат дека токму Џони Деп се крие зад маската. Некои од нив биле облечени како негови најпознати филмски ликови, а актерот за време на околу триесетминутната интерактивна изведба се шегувал со нивните костими и приредил низа импровизирани скечеви што предизвикале воодушевување кај публиката.
Овој проект се смета за едно од најзначајните враќања на Џони Деп во големите холивудски продукции, по периодот обележан со судски процеси и големо медиумско внимание. Првите сцени од филмот веќе беа прикажани на CinemaCon во Лас Вегас, каде што актерот беше поздравен со долготрајни овации.
