Познатиот британски актер Сајмон Расел Бил откри дека веќе осум месеци тајно се бори со рак на дебелото црево, дијагноза која целосно му го променила животот и работниот ритам.
Актерот, кој во популарната серија Куќа на змејот го толкува ликот Сер Сајмон Стронг, призна дека здравствените проблеми започнале веднаш по интензивниот работен период и снимањата поврзани со универзумот на „Игра на тронови“.
Според неговото сведочење, по завршувањето на театарскиот ангажман во „Тит Андроник“ во Стратфорд, а потоа и работата на серијата, бил итно префрлен во болница, каде лекарите ја откриле сериозната дијагноза. Тој претходно се повлече од една театарска претстава, што тогаш беше објаснето како последица на „лоша здравствена состојба“.
Во своето обраќање на настан во Лондон, актерот отворено зборувал за тежината на периодот низ кој минува.
„Последните осум месеци беа навистина комплицирани… особено е тешко кога мора да се повлечете од проекти“, изјавил тој, опишувајќи ја психолошката тежина од прекинот на професионалните обврски.
И покрај сериозната дијагноза, Расел Бил не се повлекува целосно од сцената. Тој веќе прифатил нов ангажман како наратор во куклена адаптација на делото „Венера и Адонис“, кое ќе се изведува низ Велика Британија.
Актерот нагласил дека и понатаму сака да работи, и покрај ризиците што ги носи неговата состојба.
„Сега сум во фаза кога се прашувам дали смеам повторно да ризикувам… и одлучив дека ќе ризикувам“, изјавил тој, најавувајќи враќање на професионалните обврски.
По неговото повлекување од сценски проект во Вест Енд, улогата ја презеде Џон Хоџкинсон, а од Кралска Шекспирова компанија порачаа дека се длабоко погодени од неговото повлекување и му посакаа брзо закрепнување.
И покрај тешката дијагноза, актерот останува решен да продолжи со работа, додека истовремено се бори со една од најсериозните здравствени состојби во својот живот.
