Регионалните медиуми објавуваат нови тврдења поврзани со здравствената состојба на пејачката Мина Костиќ, откако се појавија информации дека таа наводно била примена во Специјалната болница за психијатриски болести „Д-р Лаза Лазаревиќ“ во Белград.
Според пишувањата на српските медиуми, кои се повикуваат на извори блиски до пејачката, Костиќ во последниот период поминувала низ сериозен емотивен и психички притисок, при што се споменува дека станувало збор за состојба на депресија поврзана со приватни и професионални проблеми.
Во центарот на вниманието се наоѓа и нејзиниот однос со партнерот Мане Ќурувија Каспер, кој живее во САД. Според неофицијални информации, разделеноста меѓу нив дополнително влијаела врз нејзината психичка состојба.
Медиумите пренесуваат и дека во нејзиното непосредно опкружување биле забележани промени во однесувањето во последниот период, при што таа наводно била повлечена и помалку присутна во јавноста, но овие информации не се официјално потврдени.
Според истите наводи, партнерот на пејачката по добивање на вестите за нејзината наводна хоспитализација отпатувал во Србија и се обидел да дознае повеќе за нејзината состојба.
Нејзината сестра Биза изјавила дека не располага со информации и дека подолг период немале контакт.
Засега нема официјална потврда од семејството или од здравствените институции, а од болницата не се изнесуваат детали поради заштита на приватноста на пациентите.
