Враќањето на Селин Дион на сцената во Париз предизвика вистинска сензација и невиден интерес кај обожавателите ширум светот. Според извештаите, дури 9 милиони луѓе се регистрирале во обид да обезбедат билети за нејзините ексклузивни концерти – бројка што би можела да постави нов светски рекорд.
Канадската музичка дива најави серија од десет концерти во арената Paris La Défense Arena, кои ќе се одржат од 12 септември до 14 октомври. Најавата беше објавена на нејзиниот 58-ми роденден, што дополнително ја зголеми еуфоријата кај публиката.
Организаторите од AEG не го кријат воодушевувањето од интересот. „Ова е лудило, историски момент“, изјавија тие, додавајќи дека системот за продажба на билети преку AXS успеал да издржи огромен притисок од корисници.
Познатата продуцентка Џеки Ломбард, која соработувала со ѕвезди како Мадона и Мајкл Џексон, изјави дека никогаш не видела вакво нешто во својата кариера. Според неа, побарувачката е толку огромна што Дион можела да одржи и стотина концерти и повторно да има распродадени сали.
Овој феноменален интерес не само што ја потврдува огромната популарност на Селин Дион, туку и го најавува нејзиното големо и долгоочекувано враќање на светската музичка сцена.
