Светски познатата ријалити ѕвезда Ким Кардашијан откри досега непознати детали од бурниот брак со раперот Канје Вест, признавајќи дека одредени моменти од нивната врска целосно ѝ го промениле животот.
Во извадоци од новата книга на новинарот Џонатан Ван Метер, „Citizen Kim: The Woman Who Created the Future“, објавени во американскиот магазин „The Cut“, Кардашијан зборува за влијанието што поранешниот сопруг го имал врз нејзиниот изглед, кариерата и приватниот живот.
„Мислам дека тој всушност се вљуби во идејата за мене и во сè што можеше да направи од тоа“, признала Ким.
Набргу по почетокот на нивната врска во 2012 година, Канје ангажирал стилисти кои замениле речиси цела нејзина гардероба со дизајнерска облека. Ким признала дека едвај ги задржала солзите кога исчезнале чевлите што ги собирала со години.
Но, најголемиот шок следувал кога дознала дека е бремена.
Иако лекарите претходно ја предупредувале дека би можела да има проблеми со зачнувањето, бременоста дошла неочекувано.
„Забременив уште првиот месец. Помислив: ‘По ѓаволите’. Буквално мислев дека животот ми е завршен“, открила Кардашијан.
Таа раскажала дека плачела толку силно што Канје првично помислил дека починал некој член на нејзиното семејство. По една недела размислување, одлучила да ја продолжи бременоста, а во јуни 2013 година се родила нивната ќерка Норт.
Во книгата се споменуваат и семејните конфликти, вклучувајќи наводна жестока расправија за време на претседателската кампања на Канје во 2020 година, како и неговата желба семејството да се пресели во Вајоминг.
Ким поднесе барање за развод во февруари 2021 година, а нивниот брак официјално заврши во ноември 2022 година.
И покрај разделбата, таа признава дека Канје оставил огромно влијание врз нејзиниот живот и кариера.
