Албанскиот премиер Еди Рама најави нов пакет законски мерки за спречување на насилството за време на протестите, со кои се предвидуваат парични казни што би можеле да достигнат до 5.500 евра.
Според најавените правила, одговорност ќе сносат не само лицата кои директно предизвикуваат насилство, туку и демонстрантите кои ќе останат во групи што фрлаат камења, подметнуваат пожари или уништуваат имот, и покрај претходното полициско предупредување да се оддалечат.
Рама го претстави пакетот како одговор на насилството и, како што го нарече, „урбаната анархија“, нагласувајќи дека мерките не се насочени против граѓаните кои мирно го изразуваат своето незадоволство.
Тој посочи дека одговорноста за материјалната штета ќе се утврдува врз основа на однесувањето на секој поединец.
Од предвидените санкции ќе бидат изземени новинарите, лекарите, набљудувачите, службените лица и случајните минувачи.
Посебна новина е финансиската одговорност на родителите, кои ќе треба да ја надоместат штетата доколку таа е предизвикана од деца помлади од 14 години.
Пакетот предвидува и финансиска помош за малите бизниси погодени од насилни протести. Според најавите, државата би покривала од 70 до 100 проценти од штетата настаната од провали, грабежи и пожари.
Дополнително, планирани се закон за надоместување на штетата, измени на правилата за јавни собири, електронски регистар на прекршители и промени во Кривичниот законик.
Албанскиот премиер порача дека е подготвен да ги слушне забелешките на граѓаните за работата на владата, но нагласи дека политичките барања, вклучително и барањето за негова оставка, не смеат да се наметнуваат преку насилство.
Предложените мерки засега се најавени, а нивната примена ќе зависи од усвојувањето на потребните законски измени.
