Возачите кои патуваат низ Словенија ќе треба дополнително да внимаваат на ограничувањата на брзината, бидејќи на неколку автопатски делници е поставен нов систем за контрола што ја пресметува просечната брзина на движење.
За разлика од класичните радари, кои ја регистрираат брзината во одреден момент, новите камери го следат времето потребно возилото да помине определена делница.
Тоа значи дека забавувањето непосредно пред камерата, а потоа повторното забрзување, нема да биде доволно за избегнување казна.
Системот функционира со две групи камери. Првите го бележат времето на влегување на возилото на делницата, а вторите времето на излегување. Врз основа на растојанието и изминатото време се пресметува просечната брзина.
На пример, доколку возило помине 10 километри за четири минути, неговата просечна брзина изнесува 150 километри на час.
Според објавените информации, системот е поставен на четири автопатски делници:
- А1 Логатец – Врхника, кон Љубљана.
- А2 Љубљана Брод – Водице, кон Крањ.
- А2 Гросупље – Иванчна Горица, кон Ново Место.
- А1 Подмиљ – Лочица, кон Марибор, кај тунелите Тројане.
Казните за пречекорување на брзината се движат од 40 до 1.200 евра, зависно од тежината на прекршокот.
За пречекорување до 10 километри на час предвидена е казна од 40 евра, додека за поголеми пречекорувања санкциите постепено се зголемуваат.
Највисоката наведена казна од 1.200 евра се однесува на возење повеќе од 60 километри на час над дозволената брзина.
За потешките прекршоци, покрај паричните казни, се предвидени и казнени бодови.
