Сериозна кадровска криза го погоди затворот Реметинец во Загреб, каде што во последниот месец три медицински сестри поднеле отказ, оставајќи го затворскиот здравствен систем со недоволно персонал.
Поради недостигот од медицински работници, затворските полицајци веќе помагаат во распределувањето на лекови и терапија на затворениците, предупредуваат од Синдикатот на државните и локалните службеници и вработени.
Дополнителен проблем е што и затворската полиција се соочува со недостиг од кадар, поради што вработените работат прекувремено, а се ангажира и помош од други казнено-поправни установи.
„Ако медицинската сестра си замине, нејзината работа не исчезнува. Некој мора да ја обезбеди терапијата, да ги следи здравствените потреби и да реагира кога ќе се појави проблем“, предупредуваат од синдикатот.
Оттаму нагласуваат дека ситуацијата не претставува само проблем со организацијата на работата, туку директно влијае врз здравствената заштита на затворениците и безбедноста на установата.
За разлика од граѓаните на слобода, затворениците немаат можност самостојно да изберат друг лекар, поради што одговорноста на државата е уште поголема.
Синдикатот уште на 2 октомври побарал интервенција од Министерството за здравство, но предупредува дека состојбата дополнително се влошува.
Од надлежните институции се бараат конкретни податоци за бројот на медицински работници што го напуштиле затворскиот систем, успешноста на конкурсите за вработување и планот за надминување на кризата.
Синдикатот бара и јасен одговор кој ќе ја преземе одговорноста доколку недостигот од персонал продолжи да се зголемува.
